Po imoi sa prus parti manna de is Rossomori est de ereu sardista de manu manca e po cussu, po cumprendi beni custu movimentu de oi, tòcat a sciri su sardismu e totu.

Innoi a costau e a suta si poneus unus cantu librus chi si podint agiudai a connosci e a cumprendi su mundu sardista bèciu chi, in su beni e in su mali, at fatu sa stòria de Sardìnnia in is ùrtimus cent’annus.

• Sardisti de Sarbadori Cubeddu. Bolùminis 1 e 2.
• La Sardegna sarà redenta dai Sardi de Antoni Lèpori.

Is duus bolùminis mannus de Cubeddu arrìbant fintzas a su 1976 e su libru de Lèpori no est una stòria assetiada ma prus chi atru un’arregorta de pentzamentus e de chistionadas de is sardistas.

Duncas, ancoras no s’agàtat libru de sa stòria de su PSdAz de su 1976 a oi. Custa est una farta manna, ca aici abàrrat chena de contai fintzas su tempus de Màriu Melis Presidenti de s’Arregioni chi, a su contras, est de importu mannu.

Ma chini si dda còntat?
Cumenti podit essi chi unu partidu a su tempus aici tanti forti no apat incarrigau e pagau nisciunus po scriri sa stòria?

Is giòvunus de oi, chi sciessint beni su chi Màriu Melis at fatu, iant a podi sighiri a fai sa cosa giusta e a no torrai a fai sa cosa sballiada.

A su prus, de Màriu Melis s’agàtant unas cantu chistionadas.